教科書話，報章、雜誌、電視、電台以及互聯網等等一切傳播媒介，具有作為政府以及人民o既橋樑去互相傳遞訊息以及監察政府言行舉止o既功能。但雞蛋同友人就覺得，香港o既傳媒已經忘記左呢兩個主要功能。當中以報章最為奇怪。因為雜誌都仲話為求銷量而刊登淫照，但報紙就唔知點解好似係想唱衰香港咁o既。大字標題傳遞香港o既不利因素，直頭有引起公眾不安，甚至顛覆國家之嫌。

      難怪當年報紙大力反對23條。因為假如真係立左法的話，丫你老總仲唔有得震無得訓...

      就話說雞蛋早兩日睇到某報章頭版o既標題係：兩岸直航飛起香港。嘩~睇到呢個標題， 大佬你仲唔嚇死我地香港人呀~!?講到好似我地俾人排斥咁。我相信8成以上o既人睇完個心都寒一寒。而雞蛋除左寒一寒之外仲躁一躁。因為事實根本唔係飛起香港。假若以後香港唔可以有機直去台灣咁就叫飛起香港。依家只係「侵埋其他人玩」，但就講到香港以後無份玩咁。唔係唔俾你寫不利因素，但標題改寫為「中台兩岸直飛 港旅業面臨考驗」都可以突出主題，但至少睇到無咁驚先丫嘛大佬....

      該新聞內容之中又談及訪問首批直航去台灣旅遊o既內地旅客，就問佢地：「假如台灣同香港俾你揀，你會揀邊個作為旅行目的地呢?」而佢地就答：「當然係台灣啦」。有D人更加話台灣必定係首選。咁...好正常丫。你問班準備去台灣o既人，佢地唔話首選去台灣，唔通答去香港?答香港佢地就去左香港啦，仲去台灣??相反你問班正準備去香港o既內地旅客，佢地都一定會答首選係香港咖~呢D引導性o既問題拎出o黎當論點去辯證台灣將取代香港成內地旅客首選，又豈不是有嘩眾取寵、誤導讀者、引起公眾不安之嫌?

      報導之中雞蛋覺得最正確o既就係引述國家旅遊局長邵琪偉叫香港人要自強去維持競爭力。呢點雞蛋係絕對同意。想當年獅子山下年代o既香港，人民生活絕對唔會俾現今好，但人民o既鬥志絕對比現今有過之而無不及。無錯，當年香港商機處處、遍地黃金。但現今香港商機絕不比當年遜色：政制更建全、基建更完善；當年有英國用腦幫手，依家有阿爺出錢幫手；當年香港等人開發，依家成個中國、東南亞等香港去開發。唯一不同係當年早兩代移居香港o既人默默耕耘。可惜依家新移民，又或香港土生土長o既人就以口代手，朝一句政府剝削小市民利益，晚一句要求更好福利，大家都以「精人出口，笨人出口」為致富之道...

      不過話分兩頭說。國家旅遊局長o既其中一個意見真係令雞蛋哭笑不得。因為報導引述佢重點提出，香港必須提供更多新的景點，才能維持吸引力。但問題係香港D o野就擺晒出o黎無收埋咖啦，係得咁多o既jei。咁仲可以晌邊搵D新景點出o黎呢??OKOK，無咪起囉~建設香港係好事丫嘛。但香港就係晌一方面建設D吃力不討好o既景點，一方面摧毀一D討好不吃力o既景點：半賣半送o既迪迪尼聲名狼藉、耗資10億元o既昂坪360更被譽為「香港笨豬跳」。相反皇后碼頭以及中環鐘樓呢D有歷史價值o既觀光景點就要被拆卸作商廈用途。起新景點無問題，但為商業而拆毀有歷史價值o既觀光景點，值得嗎?

      香港政府係一個商業政府，呢點無容置疑。但問題係，一個社會要平衡發展，萬不能所有o野都以商業為先。法國藝術、奧地利音樂、意大利歌劇、其他國家至少都支持運動...呢D藝術、音樂、運動正正係陪育人民質素o既不二法門，可惜香港全部欠奉。換o黎o既係年青人淨係識打PSP、睇漫畫、八卦雜誌，致使人民素質每況愈下，連考評局都要整兩句「見鬼切O咀 潛水怕屈機」去將就新一代。真箇一代不如一代...並非甚麼兩岸直航飛起香港，反而係傳媒o既操守、政府o既思維以及新一代o既質素先應該係最令港人擔憂o既不利因素矣...

雞蛋